Kosova përfundimisht ka humbur mundësinë për të marrë vendin e parë në Ligën e Kombeve.
“Dardanët” u mposhtën nga Greqia me rezultat 2-0, në ndeshjen e xhiros së katërt të Ligës C, shkruan Indeksonline.
Por çfarë ndodhi në këtë ndeshje me shumë presion e me shumë provokime në fushë e në tribuna?
Ende pa filluar ndeshja, tifozët grek filluan me provokime ndaj tifozëve të Kosovës duke ua drejtuar flamurin serb në mes të hartës së Kosovës.
Fyerjet dhe sharjet vazhduan edhe gjatë intonimit të himnit të Kosovës, ku gjatë gjithë kohës himni u fishkëllua nga tifozët e Greqisë.
Ndeshja vazhdonte derisa problemet në tribuna vazhduan gjatë gjithë kohës.
Në fushë lojtarët janë sulmuar me drita laseri gjatë gjithë lojës derisa për gjyqtarin ishte gjithçka normale.
Me të përfunduar pjesa e parë, pati përplasje në tribuna, ku disa tifozë grek shkuan deri te “Dardanët” për t’i sulmuar fizikisht.
Pjesa e dytë me të njëjtin ritëm, me të njëjta provokime derisa policia greke i kishte izoluar tifozët e Kosovës, në vend se t’i ndal tifozët vendas.
Laserat nuk u ndalën aspak as në pjesën e dytë derisa kishte edhe një moment të dyshimtë për penallti në minutën e 66-të.
Derisa Kosova po merrte lojën në dorë, Greqia shënoi me anë të Giakounakis, duke shfrytëzuar pikën e tyre më të fortë, lojën në ajër.
Ndeshja u ndërpre rreth 5 minuta derisa tifozët janë futur në fushë dhe kanë gjuajtur me gjëra të forta.
Kosova në minutat e fundit shkoi e tëra në fushë me të gjithë fuqinë, madje edhe me Arijanet Muric.
Derisa Kosova po sulmonte, grekët shënuan edhe golin e dytë me anë të Mantalos.
Giresse në këtë ndeshje erdhi me vetëm katër rezerva duke bërë që të kishte shumë pak mundësi zëvendësimi.
Kosova kështu humbi rastin për të marrë vendin e parë në grup dhe dy ndeshjet e fundit do të jenë vetëm për statistika. /IndeksOnline/
