Ndryshimet kushtetuese duhet të ndodhin, pasi pa to Maqedonia është në regres, në status kuo dhe nuk mund të shkojë përpara dhe nga ky proces absolutisht fitues është populli maqedonas në RMV, deklaroi sot nënkryetari i parë i Qeverisë, Artan Grubi. Potencon se krahu proevropian në opozitë është në rritje në Kuvend dhe se do të japë mbështetje për ndryshimet kushtetuese dhe se tashmë ka kontakte dhe komunikimin me deputetët dhe kryetarët e partive politike, për, siç tha, mënyrën në të cilën ata do ta japin mbështetjen e tyre për Maqedoninë evropiane.
“Dua të sqaroj se ndryshimet kushtetuese jo vetëm që do të ndodhin, por është e patjetërsueshme të ndodhin. Pa ndryshimet kushtetuese Maqedonia është në regres. Pa ndryshimet kushtetuese, Maqedonia është në status kuo dhe nuk mund të ecë përpara, prandaj të gjithë ata që duan një Maqedoni evropiane, të gjithë ata që duan zhvillim, të gjithë ata që duan ta shohin vendin tonë krah për krah me anëtarët e BE-së do t’i mbështesin ndryshimet kushtetuese nga të cilat përfituesi më i madh është komuniteti maqedonas në Republikën e Maqedonisë së Veriut sepse më në fund është bërë ndarja e popullit maqedonas nga populli bullgar. Dhe kjo me pranimin e vetë popullit bullgar, i cili kishte pretendime të tjera. Siç e dini, deri dje. Përfituesi më i madh i këtij procesi është absolutisht në radhë të parë populli maqedonas në RMV dhe të gjithë qytetarët e vendit, sepse mendoj se e gjithë tapia e shtetësisë së RMV-së është duke u rrumbullakësuar”, tha Grubi, i cili sot ishte në Haraçinë.
Sipas tij, bullgarët konfirmojnë se ka ndarje absolute, se populli maqedonas dhe gjuha maqedonase ekzistojnë dhe se ky është realitet dhe e pranojnë këtë me këto ndryshime kushtetuese.
“Pra, ne kemi një bashkësi të veçantë të bullgarëve në RMV që nuk janë më shumë se 3.500 qytetarë siç e pamë me regjistrimin e fundit dhe se të gjithë të tjerët janë maqedonas që flasin gjuhën maqedonase dhe janë pjesë e popullit maqedonas”, thotë Grubi.
Nënkryetari i parë në Qeveri beson se “krahu pro-evropian që është në rritje në opozitë në Kuvend do të mbështesë ndryshimet kushtetuese dhe tashmë kemi kontakte, po komunikojmë me deputetët, po komunikojmë me kryetarët e partive politike në atë mënyrë që edhe ata të japin mbështetjen e tyre për Maqedoninë evropiane”.
I pyetur se sa maqedonas punojnë në Ministrinë e Sistemit Politik, Grubi tha se ka maqedonas, romë, turq dhe se në kuadër të Ministrisë është edhe Agjencia për komunitete pakicë ku janë të gjitha komunitetet, Drejtoria për Kulturë, Drejtoria për arsimimin e komuniteteve, kështu që nuk e di përfaqësimin e saktë në përqindje.
Ai tha se i vjen keq që jo shumica e maqedonasve e mbështetën Festivalin për të përkujtuar Marrëveshjen e Ohrit.
“Kemi pasur një shkollë të shkëlqyer politike për liderë të rinj në të cilën kanë marrë pjesë maqedonas, shqiptarë, rom, turq, vlleh, serb dhe nga të gjitha komunitetet dhe do të doja të merrja mbështetje sociale për aktivitete të tilla, ndërsa festivali më vjen keq që nuk gjeti mbështetje në mesin e shumicës së qytetarëve maqedonas dhe se publiku reagoi në mënyrë histerike ndaj çdo mundësie që një maqedonas të këndojë në një festival që përkujton 13 gushtin – Ditën e Marrëveshjes Kornizë të Ohrit. Më vjen shumë keq që askush nga e gjithë shoqëria nuk u ngrit për një maqedonas që do të merrte pjesë në një ngjarje të tillë të përbashkët për të shënuar nënshkrimin e marrëveshjes së paqes të nënshkruar nga të gjitha partitë politike maqedonase dhe në fakt sot është Kushtetuta e RMV-së”, tha Grubi.
